Tiranë – Ka ndërruar jetë ish zëvendëskryeministri dhe ministri për Industrinë, Energjetikën dhe Burimet Minerale në qeverinë e parë të Partisë Demokratike, Abdyl Xhaja. Lajmin e ka bërë të ditur ish-kryeministri Sali Berisha, i cili shprehu ngushëllimet e tij për familjarët, të afërmit dhe miqtë e të ndjerit.
“Abdyl Xhaja, intelektual ekonomist, u bashkua me lëvizjen demokratike në fillimet e saj dhe përfaqësoi qytetarët e Elbasanit në parlament. Si ministër dhe zëvendëskryeministër ai përmbushi me përkushtim, nder dhe dinjitet misionin e tij dhe dha një kontribut të çmuar në reformat për transformimin e ekonomisë shtetërore socialiste të falimentuar në ekonominë e tregut të lirë,” shkruan Berisha në mesazhin e tij.
Berisha e përshkruan Abdyl Xhajën si një qytetar, prind dhe bashkëshort shembullor, duke shtuar se lutet që shpirti i tij të gjejë paqen e merituar.
I ndjeri Abdyl Xhaja do të kujtohet si një nga figurat kyçe të tranzicionit shqiptar drejt ekonomisë së tregut pas rënies së regjimit komunist.
Ngushëllime familjes dhe miqve të tij.
